నోకియా 6.3 ఫొటోలు లీక్

Written by : smtv Desk | Fri, Jan 08, 2021, 06:47 PM

నోకియా రూపొందిస్తున్న కొత్త ఫోన్‌కు సంబంధించిన వివరాలు బయటకు వచ్చాయి. అది నోకియా 6.3 లేదా నోకియా 6.4 అయ్యే అవకాశం ఉందని తెలుస్తోంది. ప్రముఖ టిప్ స్టర్ ఆన్ లీక్స్ దీనికి సంబంధించిన ఫస్ట్ లుక్‌ను లీక్ చేవారు. దీన్ని బట్టి ఈ ఫోన్‌లో 6.45 అంగుళాల ఫ్లాట్ డిస్ ప్లేను అందించనున్నారు.

ఈ ఫోన్ 16.49 సెంటీమీటర్ల పొడవు, 7.68 సెంటీమీటర్ల వెడల్పు, 0.92 సెంటీమీటర్ల మందం ఉండనుంది. నోకియా 6.2 కంటే ఇది కాస్త పెద్ద డిస్ ప్లే అనే చెప్పాలి. ఎందుకంటే నోకియా 6.2లో 6.3 అంగుళాల డిస్ ప్లేను అందించారు. ఈ ఫోన్‌లో 6.45 అంగుళాల డిస్ ప్లే ఉండనుంది.

ఇందులో వెనకవైపు నాలుగు కెమెరాలు ఉండనున్నాయి. దీంతోపాటు డ్యూయల్ ఫ్లాష్ కూడా ఇందులో ఉంది. నోకియా 6.3/6.4లో ఫింగర్ ప్రింట్ సెన్సార్ పొజిషన్ కూడా మారనుంది. నోకియా 6.2లో ఫింగర్ ప్రింట్ సెన్సార్‌ను ఫోన్ వెనకవైపు అందించారు. కానీ ఇందులో మాత్రం ఫోన్ పక్కభాగంలో ఫింగర్ ప్రింట్ సెన్సార్ అందించారు. పవర్ బటనే ఫింగర్ ప్రింట్ సెన్సార్‌గా ఉండనుంది. వాల్యూమ్ బటన్ల కింద ఈ పవర్ బటన్ ఉండనుంది.

ఫోన్‌కు ఎడమవైపు ప్రత్యేకమైన గూగుల్ అసిస్టెంట్ బటన్ అందించారు. ఇందులో హెడ్ ఫోన్ జాక్‌ను కూడా అందించారు. ఈ ఫోన్ 2021 ఏప్రిల్‌లో లాంచ్ కానుందని ఈ టిప్ స్టర్ పేర్కొన్నారు.

నోకియా పవర్ యూజర్ కథనం ప్రకారం ఇందులో 4300 ఎంఏహెచ్ బ్యాటరీని అందించనున్నారు. ఈ బ్యాటరీ మోడల్ ఇటీవలే టీయూవీ రెయిన్‌ల్యాండ్ సర్టిఫికేషన్ వెబ్ సైట్లో కనిపించింది.