మార్చి 23న రానున్న వన్ ప్లస్ 9 సిరీస్

Written by : smtv Desk | Mon, Mar 08, 2021, 06:58 PM

వన్ ప్లస్ 9 సిరీస్ మార్చి 23వ తేదీన లాంచ్ కానుంది. ఈ విషయాన్ని వన్ ప్లస్ అధికారికంగా ప్రకటించింది. ఇందులో మూడు మోడళ్లు ఉండనున్నట్లు తెలుస్తోంది. వన్ ప్లస్ 9, వన్ ప్లస్ 9 ప్రో, వన్ ప్లస్ 9ఈ లేదా వన్ ప్లస్ 9ఆర్ వీటిలో ఉండే అవకాశం ఉంది. దీంతోపాటు కెమెరా తయారీ సంస్థ హాసెల్‌బ్లాడ్‌తో భాగస్వామ్యం పెట్టుకుంటున్నట్లు కంపెనీ ప్రకటించింది. వచ్చే మూడేళ్లలో కెమెరాలు మెరుగు పరచడం కోసం ఏకంగా 150 మిలియన్ డాలర్లు(సుమారు రూ.1,094 కోట్లు) ఖర్చు చేస్తామని పేర్కొంది. వన్ ప్లస్ 9 సిరీస్ ఫోన్లు మార్చి 23వ తేదీన ఉదయం పది గంటలకు(మనదేశ కాలమానం ప్రకారం రాత్రి 7.30) లాంచ్ కానుంది. ఈ కార్యక్రమాన్ని వన్ ప్లస్ వెబ్ సైట్లో ప్రత్యక్షప్రసారం చూడవచ్చు. ఈ లాంచ్ తేదీ గతవారమే లీకైంది. గతేడాది వచ్చిన వన్ ప్లస్ 8 సిరీస్‌లో రెండు ఫోన్లే ఉండగా.. ఈ సిరీస్‌లో మూడు ఫోన్లు ఉండనున్నట్లు తెలుస్తోంది. వన్ ప్లస్ 9 సిరీస్‌లో 12 బిట్ రా సపోర్ట్ ఉన్న సోనీ ఐఎంఎక్స్789 సెన్సార్‌ను ఉపయోగించనున్నట్లు కంపెనీ ప్రకటించింది. దీంతో 4కే వీడియోను 120 ఎఫ్‌పీఎస్ స్పీడ్‌లో.. 8కే వీడియోను 30 ఎఫ్‌పీఎస్ స్పీడ్‌లో రికార్డు చేయవచ్చు. వన్ ప్లస్ 9 సిరీస్‌లో స్టెల్లార్ బ్లాక్ కలర్ ఆప్షన్ ఉండనుందని ప్రముఖ యూట్యూబర్ వైభవ్ జైన్ పేర్కొన్నారు. ఈ తరహా డిజైన్ వన్ ప్లస్ వన్, వన్ ప్లస్ 2 ఫోన్లలో ఉండేది. ఇప్పుడు మళ్లీ అదే డిజైన్‌ను తీసుకువస్తున్నారో.. మార్పులు చేయనున్నారో తెలియరాలేదు. ఈ వన్ ప్లస్ 9 సిరీస్‌తో పాటు బాక్స్‌ను కచ్చితంగా అందిస్తామని కంపెనీ ప్రకటించింది. యాపిల్, శాంసంగ్ కంపెనీలు తమ ఫ్లాగ్ షిప్ ఫోన్లలో ఇప్పటికే చార్జర్‌ను అందించడం ఆపేశాయి. కానీ వన్ ప్లస్ మాత్రం ఆ దారిలో పోయేది లేదని కంపెనీ ప్రకటించింది. వన్ ప్లస్ 9 సిరీస్‌తో పాటు వన్ ప్లస్ వాచ్ అనే స్మార్ట్ వాచ్ కూడా లాంచ్ కానుందని సమాచారం. వన్ ప్లసస్ 9 ఫోన్లూ, స్మార్ట్ వాచ్ గ్లోబల్ లాంచ్‌తో మనదేశంలో కూడా లాంచ్ అయ్యే అవకాశం ఉంది. ఒకేసారి కాకపోయినా.. ఎక్కువ గ్యాప్ ఇవ్వకుండానే కంపెనీ వీటిని మనదేశంలో లాంచ్ చేస్తుంది. ఎందుకంటే వన్ ప్లస్‌కు ఉన్న పెద్ద మార్కెట్లలో మనదేశం కూడా ఒకటి.