"ఆయన ఈ దేశానికి సూపర్‌స్టార్"

Written by : smtv Desk | Thu, May 06, 2021, 06:54 PM

బాలీవుడ్ స్టార్ హీరో సల్మాన్ ఖాన్ హీరోగా, ఇండియన్ మైఖేల్ జాక్సన్ ప్రభుదేవా దర్శకత్వంలో రూపొందిన భారీ యాక్షన్ చిత్రం ‘రాధే’. 2019 తర్వాత సల్మాన్ ఖాన్ చేస్తున్న చిత్రం కావడంతో దీనిపై అభిమానులు భారీ అంచనాలు పెట్టుకున్నారు. ఇప్పటికే విడుదలైన ఈ సినిమా టీజర్ వీక్షకులను ఆకట్టుకుంది. ముఖ్యంగా ‘డీజే’ సినిమాలోని సీటీమార్‌కి ఈ సినిమాలో సల్మాన్ వేసే స్టెప్స్ ప్రత్యేక ఆకర్షణగా నిలిచాయి. ఇక ఈ సినిమాలో సల్మాన్ సరసన దిశా పటానీ హీరోయిన్‌గా నటించింది. ఈ సందర్భంగా సల్మాన్ ఖాన్‌తో కలిసి నటించడంపై తన అనుభవాన్ని దిశా పంచుకుంది. గతంలో సల్మాన్ నటించిన ‘భరత్’ అనే సినిమాలో దిశా ఓ స్పెషల్ సాంగ్‌లో చిందులు వేసింది. ఇక ఈ సినిమాలో సల్మాన్‌ పక్కన హీరోయిన్‌గా చేయడం తనకు ఎంతో సంతోషంగా ఉందని ఆమె పేర్కొంది. ‘‘ఆయన చాలా మంది వ్యక్తి. ప్రతీ ఒక్కరిని సమానంగా చూస్తారు. ఆయన ఎందరికో ఆదర్శం. ఈ దేశానికి సూపర్‌స్టార్ అయిన సల్మాన్‌తో కలిసి నటించే అవకాశం లభించడం నా అదృష్టంగా భావిస్తున్నాను. ఇలాంటి అవకాశం మళ్లీ.. మళ్లీ రాదు’’ అని దిశా వెల్లడించింది. ఇక ప్రభుదేవా గురించి, సీటీమార్ పాట గురించి మాట్లాడుతూ.. ‘‘ఆ పాటకి డ్యాన్స్ చేయడం చాలా కష్టం అనిపించింది. ఇక ప్రభుదేవాతో కలిసి పని చేయడం నాకు ఇదే తొలిసారి. అందుకు నాకు కొంచెం భయం వేసింది. కానీ, ప్రభుదేవా చాలా ఓపికగా నాకు నేర్పించారు. అది చాలా విభిన్నమైన కొరియోగ్రాఫీ.. కానీ, చాలా వినోదంగా ఉండేది’’ అని ఆమె చెప్పింది.