ఈ ఆహార పదార్థాలతో త్వరగా వయసు పైబడిన లక్షణాలు కనిపిస్తాయట!

వయసు పైబడే కొద్ది శరీరంలో అనేక రకాలైన మార్పులతో పాటు చర్మం ముడతలు పాడడం అనేది సహజంగా జరిగేదే. అయితే ప్రస్తుత కాలంలో ఒత్తిడి, చెడు ఆహారం అలవాట్లు, నిశ్చల జీవనశైలి, కాలుష్యం వంటి కారణాల వల్ల 30 దాటక ముందే చర్మంపై ముడతలు, గీతలు రావడం వయసుకు మించి కనిపించడం జరుగుతుంది. అయితే మన డైట్‌లో సమతుల్య ఆహారం చేర్చుకుని కొన్ని అలవాట్లను వదులుకుంటే వృద్ధాప్య ఛాయలను తర్వగా రాకుండా చూసుకోవచ్చు అని నిపుణులు అంటున్నారు. మరి మన అందాన్ని కాపాడుకోవడానికి ఏంచేయాలి అనేది తెలుసుకుందాం ..

ఫ్రైడ్ జంక్ ఫుడ్..
ఫ్రైడ్ జంక్ ఫుడ్స్‌ను హైడ్రోజనేటెడ్ వెజిటబుల్ ఆయిల్స్‌తో తయారు చేస్తారు. వెజిటబల్‌ ఆయిల్‌లో ట్రాన్స్‌ ఫ్యాట్స్‌ ఎక్కువగా ఉంటాయి. ట్రాన్స్‌ ఫ్యాట్స్‌ మన ఆరోగ్యం, చర్మంపై హానికరమైన ప్రభావాలను చూపుతాయి. ట్రాన్స్‌ ఫ్యాట్స్‌ శరీరంలో చెడు కొలెస్ట్రాల్‌ స్థాయిలను పెంచడమే కాదు.. వృద్ధాప్యాన్ని ప్రోత్సహించే ఇన్ఫ్లమేషన్‌ను కూడా ప్రోత్సహిస్తాయి. ఈ ఆహారాలు మిమ్మల్ని డీహైడ్రేట్ చేస్తాయి, దీని కారణంగా చర్మం నిర్జీవంగా మారుతుంది. మీ అందాన్ని సంరక్షించుకోవడానికి.. జంక్ ఫుడ్‌కూ దూరంగా ఉండండి.


* మన ఆహారంలో రిఫైన్డ్‌ షుగర్‌ ఎక్కువగా తీసుకుంటే.. వృద్ధాప్య ప్రక్రియను వేగవంతం చేస్తుంది. చక్కెర ఎక్కువగా తీసుకుంటే.. గ్లైకేషన్‌కు దారి తీస్తుంది. ఈ ప్రక్రియలో చక్కెరలు ప్రోటీన్‌లతో కలిసి.. అడ్వాన్స్‌డ్ గ్లైకేషన్ ఎండ్ ప్రొడక్ట్స్ (AGEs) అనే హానికరమైన అణువులను ఏర్పరుస్తాయి. AGEలు కొల్లాజెన్‌, ఎలాస్టిన్‌ను దెబ్బతీస్తాయి. దీని కారణంగా.. చర్మంపై ముడతలు, ఫైన్‌ లైన్స్‌ ఏర్పడతాయని నేషనల్ లైబ్రరీ ఆఫ్ మెడిసిన్ నిర్వహించిన అధ్యయనంలో తేలింది. చక్కెర, ఫ్రక్టోజ్ కొల్లాజెన్‌లో ఉన్న అమైనో యాసిడ్‌లను కలిపి AGEలను సృష్టిస్తాయి. మీ డైట్‌లో చక్కెరకు బదులుగా.. బెల్లం, తేనె వంటి హెల్తీ ఆప్షన్స్‌ చేర్చుకోండి. ఖర్జూరం, ఎండుద్రాక్ష కూడా తీసుకోవచ్చు.

* సాసేజ్‌లు, పెప్పరోనిస్, హాట్ డాగ్‌లు వంటి ప్రాసెస్ చేసి మాంసాల్లో సోడియం సల్ఫైట్‌, సంతృప్త కొవ్వులు అధికంగా ఉంటాయి. ఇవి ఎక్కువగా తింటే.. చర్మం డీహైడ్రేట్‌ అవుతుంది, కొల్లాజెన్‌ను బలహీనపరుస్తుంది. ప్రాసెస్‌ చేసిన మాంసాలు ఎక్కువగా తింటే.. స్కిన్‌ ఇన్ఫ్లమేషన్‌కు దారితీస్తుందని నిపుణులు చెబుతున్నారు. వృద్ధాప్య ఛాయలను అడ్డుకోవడానికి.. ప్రాసెస్‌ చేసిన మాంసాలకు దూరంగా ఉండటమే మంచిది.

* ఆల్కహాల్‌ ఎక్కవగా తీసుకుంటే.. వృద్ధాప్య ఛాయలు త్వరగా వచ్చేస్తాయని నిపుణులు చెబుతున్నారు. ఆల్కహాల్ శరీరాన్ని డీహైడ్రేట్ చేస్తుంది. దీని కారణంగా చర్మం పొడిబారడం, ముడతలు పడటం వంటి జరుగుతుంటాయి. జర్నల్ ఆఫ్ క్లినికల్ అండ్ ఈస్తటిక్ డెర్మటాలజీలో ప్రచురించిన ఒక అధ్యయనం ప్రకారం ఆల్కహాల్‌ ఎక్కువగా తీసుకుంటే.. చర్మంలోని యాంటీ ఆక్సిడెంట్ డిఫెన్స్ సిస్టమ్ దెబ్బతింటుంది. దీని కారణంగా చిన్నవయస్సులోనే పెద్దవారిగా కనిపిస్తూ ఉంటారు.

* కాఫీ, టీ, కూల్‌ డ్రింక్స్‌ వంటి హై కెఫిన్‌ డ్రింక్స్‌ను చాలా మంది ఇష్టపడుతుంటారు. అయితే, కెఫిన్‌ డ్రింక్స్‌ ఎక్కువగా తీసుకుంటే.. చర్మంపై ప్రతికూల ప్రభావం చూపుతాయ. బయాలిస్టాక్‌లోని మెడికల్ యూనివర్శిటీ నిర్వహించిన ఒక అధ్యయనం ప్రకారం, కెఫీన్ కొల్లాజెన్ సంశ్లేషణను తగ్గిస్తుంది, ఇది చర్మ స్థితిస్థాపకత కోల్పోయేలా చేస్తుంది. చిన్నవయస్సులోనే వృద్ధాప్య ఛాయలు కనిపించేలా చేస్తుంది.​