భారీగా పెరిగిన ప్రముఖ టెక్ సంస్థ మెటా షేర్లు..

Written by : smtv Desk | Sat, Feb 03, 2024, 10:44 AM

మార్క్ జుకర్‌బర్గ్ సుపరిచితమైన పేరు. ప్రముఖ సోషల్ మీడియా సంస్థ ఫేస్ బుక్ వ్యవస్థాపకుడు. ఇటీవల టెక్ సంస్థ మెటా షేర్లు భారీగా పెరగడంతో సంస్థ వ్యవస్థాపకుడు మార్క్ జుకర్‌బర్గ్ సంపద బాగా వృద్ధి చెందింది. ఈ ఏడాది అత్యధిక సంపద వృద్ధి చవిచూసిన వ్యక్తిగా ఇప్పటివరకూ జుకర్‌బర్గ్ నిలిచారు. ప్రపంచ అపరకుబేరుల జాబితాలో ఐదో స్థానంలో దక్కించుకున్నారు. ఈ సంవత్సరం ఇప్పటివరకూ మార్క్ నికర సంపద విలువ 14.3 బిలియన్ డాలర్ల మేర పెరిగింది. మార్క్‌కు మెటాలో 13 శాతం వాటా ఉన్న విషయం తెలిసిందే.

మెటా షేర్ల విలువ పెరుగుతున్న నేపథ్యంలో రాబోయే రోజుల్లో మార్క్ నికర సంపద విలువ మరింత పెరుగుతుందని ప్రముఖ మార్కెట్ విశ్లేషణ సంస్థ మార్కెట్‌వాచ్ పేర్కొంది. గురువారం పోస్ట్ మార్కెట్ ట్రేడింగ్‌లో మెటా షేర్ల విలువ ఏకంగా 15 శాతం పెరిగింది. మెటా డివిడెండ్ల ఆర్జనను బహిర్గతం చేస్తానన్న మార్క్ నిర్ణయంతో షేర్లకు కొత్త ఊపు వచ్చింది. దీంతో, సంస్థ మార్కెట్ విలువ కూడా 140 బిలియన్ డాలర్ల మేర పెరిగి 1.17 ట్రిలియన్ డాలర్లకు చేరుకుంది. గతేడాదితో పోలిస్తే ఈ ఏడాది మెటా షేర్ల విలువ 109 శాతం పెరిగింది. 2012లో మెటా ఐపీఓ నాటి విలువతో పోలిస్తే ఇది 933 శాతం అధికం. ఇక ఫేస్‌బుక్ మాతృసంస్థకు 2021 అక్టోబర్‌లో మెటాగా నామకరణం చేసిన విషయం తెలిసిందే. పేరు మార్చిన తరువాత జుకర్‌బర్గ్ కు బాగా కలిసివచ్చింది.