"భారత క్రికెటర్ల ఫామ్ ను దెబ్బతీసేది విదేశీ కోచ్‌లే"...మాజీ బౌలర్

Written by : smtv Desk | Thu, Jul 22, 2021, 12:04 PM

టీమిండియా నయా హీరో దీపక్ చాహర్‌ని క్రికెట్ వదిలేయమని అప్పట్లో ఆస్ట్రేలియా మాజీ క్రికెటర్ గ్రేగ్ ఛాపెల్ హెచ్చరించాడట. ఈ విషయాన్ని తాజాగా భారత మాజీ ఫాస్ట్ బౌలర్ వెంకటేశ్ ప్రసాద్ వెలుగులోకి తెచ్చాడు. శ్రీలంకతో కొలంబో వేదికగా మంగళవారం జరిగిన రెండో వన్డేలో వీరోచిత ఇన్నింగ్స్ ఆడిన దీపక్ చాహర్ (69 నాటౌట్: 82 బంతుల్లో 7x4, 1x6).. భారత్ జట్టుని గెలిపించిన విషయం తెలిసిందే. పవర్‌ప్లే స్పెషలిస్ట్ బౌలర్‌గా పేరొందిన దీపక్ చాహర్‌కి బ్యాటింగ్‌లో చెప్పుకోదగ్గ రికార్డులు లేవు. కానీ.. శ్రీలంకపై క్లిష్ట దశలో అతను ఆడిన అసాధారణ ఇన్నింగ్స్‌కి పెద్ద ఎత్తున ప్రశంసలు లభిస్తున్నాయి. దీపక్ చాహర్ గతంలో రాజస్థాన్ క్రికెట్ అసోషియేషన్‌ తరఫున ఆడేందుకు ప్రయత్నించగా.. అక్కడే కోచ్‌గా ఉన్న గ్రేగ్ ఛాపెల్ అందుకు ఒప్పుకోలేదట. ‘‘గ్రేగ్ ఛాపెల్‌ అప్పట్లో దీపక్ చాహర్‌ని టీమ్‌లోకి తీసుకునేందుకు నిరాకరించాడు. దీపక్ చాహర్ హైట్ ఎక్కువగా ఉండటంతో.. వేరొక ప్రొఫెషన్‌‌ని ఎంచుకోవాలని గ్రేగ్ ఛాపెల్ సూచించాడు. కానీ.. శ్రీలంకపై ఒంటిచేత్తో అతను భారత్ జట్టుని గెలిపించాడు. వాస్తవానికి అతనికి బ్యాటింగ్‌లో పెద్దగా అనుభవం లేదు. అయినప్పటికీ సత్తాచాటాడు. దీనిబట్టి మనం అర్థంచేసుకోవాల్సింది ఏంటంటే..? విదేశీ కోచ్‌ల మాటల్ని సీరియస్‌గా తీసుకోకూడదు’’ అని ప్రసాద్ సూచించాడు. టీమిండియాకి గతంలో కోచ్‌గా పనిచేసిన గ్రేగ్ ఛాపెల్.. సౌరవ్ గంగూలీ కెరీర్‌ దెబ్బతినడానికి కారణమయ్యాడు. అలానే సచిన్ టెండూల్కర్‌ బ్యాటింగ్ ఆర్డర్‌ని మార్చి అతని లయని దెబ్బతీసిన ఛాపెల్.. వరుస వివాదాలతో భారత క్రికెట్‌లో ప్రకంపనలు రేపాడు.